財金圈履歷核實署署長DavidWebb（圖）又再出動！繼之前話玩具大王蔡志明學歷「假的真不了」，蔡生之後反駁話佢讀嘅係遙距課程。股壇長毛噚日就再度出口！今次仲拖埋蔡志明太太落水！長毛話，响美國路易斯安那州註冊嘅LincolnUniversity，所頒發嘅學位獲加拿大特許商業管理學院（CCIBA）認可，而亞洲知識管理協會（AKMA）則授予頒發CCIBA院士，之不過，呢三間公司嘅董事同職員都差唔多係同一幫人，而蔡志明兩公婆仲要係AKMA嘅榮譽總裁；另一位榮譽總裁就係鄭耀棠，關係複雜之餘，仲令認授性成疑。
除咗蔡氏夫婦被長看狙擊之外，照例有其他上市公司高層有份被「金榜題名」！噚日佢踢爆攞過AKMA、CCIBA或者LincolnU頒發嘅學位有以下人事，包括嘉利國際（1050）主席何焯輝、萬保剛（1213）創辦人楊敏儀、實德環球（487）副主席馬浩文、安莉芳（1388）主席鄭敏泰、積華生物（2327）主席劉友波同埋信佳國際（912）主席吳自豪。