政府拍賣粉嶺地皮，反應較預期冷淡，其實政府都好矛盾，一方面唔想樓市有泡沫，另一方面又唔肯低價賣地；同上次東涌賣地一樣，政府心中有底價，但就規管發展商賣樓要明碼實價，確係雙重標準。其身不正，難怪發展商覺得唔公道，唔投地抗議表態。政府最好諗諗計，否則雙方關係再惡化，發展商調資加碼轉戰內地，庫房收入唔見一截事小，樓宇供應出現斷層事大。
香港樓市冇睇頭，美國樓市復蘇同樣出現假象，從近期數據睇，樓價喘定，成交量回升，但樓價仍偏軟，因為最大嘅斷供問題一直惡化，首季斷供比率再創新高達4.63%，情況令人擔心。
美元資產危危乎
記得香港97後樓價大跌，但有負擔能力嘅業主，都唔希望斷供俾銀行收樓，咬緊牙關多年終於捱到家鄉，苦盡甘來。美國情況就相反，當地最近興起「策略性斷供」（StrategicDefaults），由於物業淪為負資產，越嚟越多業主選擇唔供樓，但照交管理費、卡數、供車等生活開支，美其名係將資金靈活調配，其實係「賴皮」唔找數。
據大摩統計，單係2月份嘅斷供個案，就有12%係呢類有錢唔供樓，越嚟越多業主知道即使唔供樓，由興訟到踢走業主往往要一至兩年，加上銀行唔想將壞賬曝光影響業績，惟有容忍業主嘅「拖字訣」。既然可以「攞正牌」唔還錢又唔會被迫遷，負資產業主可以睇多兩年樓價走勢，再決定係咪守落去。
呢個計時炸彈不能掉以輕心，當業主睇不到樓價回升，就有誘因加入斷供行列，一旦加息周期展開，斷供情況肯定進一步惡化。壞賬要到反映喺銀行數簿至走貨肯定係太遲，到底美元資產係咪想像中咁安全？係嘅話，國家領導人都唔會喺經濟戰略會談中，重申要保障中國嘅美元資產。
胡孟青