德法重修舊好，傾掂數願意合作為歐洲救火，為市場掃除一大不明朗因素。香港佛誕假期當晚，美股先跌後升，帶動番歐洲股市跌勢大幅收窄，真係阿彌陀佛！
陰霾已除，估計唔少「空軍」需要補空倉，呢鋪環球股市應該有得挾！內地股市上周五亦係內房股領軍下低開高收，相信內房股亦將爆發反攻。幾項利好形勢支持下，港股今日應有不俗表現。
細價股假前爆小股災，理由離唔開證券行Call孖展，有時霎時大跌，反而凸顯邊隻股份相對較硬淨。
星美（198）上周四曾跌到0.4元，但僅曇花一現，即市湧現反攻，倒升1%，收報0.49元。俗語有云，世上不會有無緣無故的愛；一隻股份硬淨，梗係有理由。星美5月初曾以0.435元配股5.03億股，集資超過2億元用作投資電影相關業務。走勢上，10日線及20日線（介乎0.55元水平）阻力唔細，唔建議冒進，反而後市見守得住配價股就可一試，以中線策略投資，回報博翻一倍。
方星俠