美國證監會仲查緊5月6日大跌市嘅元凶，到底係咪真係有人㩒錯掣咁簡單。當日係史上最大單日跌市，最受影響嘅原來係交易所買賣基金（ETF），佔當日取消交易嘅70%，其中iShares嘅Russell1000增長基金喺十幾分鐘內由近60美元跌至7.5美仙，蒸發過百億美元。
初部調查結果，當日市況急跌可能係同ETF發行商未能隨市況急跌做有效對冲有關，但實際情況係點，就未有結論。
按蛛絲馬迹，估計可能係有人落錯盤後，引發市場上電腦程式止蝕盤沽貨，指數短時間內出現急跌，令ETF電腦Hang晒機無法正常作對冲，於是市場喺短時間內突然冇咗大量流通性（Liquidity），人踩人慘劇就係咁發生。
證監會頭痛醫頭，引入5分鐘內波幅達10%就會暫停交易嘅新規定，又打算加強規管銀行衍生工具交易，但就冇任何措施針對ETF對冲困難嘅死穴。
提防ETF引發風險
去年收購iSharesETF業務嘅貝萊德（BlackRock）指，09年全球ETF資產已超過1萬億美元，按年急增45%，主要係金融海嘯後，投資者避險意識增加，認為ETF較可靠，操作簡單兼收費平。喺美國，ETF已取代傳統基金，去年總資產超過7000億美元。
大家擔心資金流出區內避險，睇ETF資金流只係短期現象，因為對歐美投資者嚟講，ETF仍係最易「入屋」嘅金融產品。
美國上市嘅ETF五花八門，近期多咗人買沽空歐元、國庫債券同VIX嘅ETF。香港上市嘅ETF種類較少，各大發行人正密鑼緊鼓大展拳腳。要留意係，香港作為區內重要金融市場，起步明顯遲過人，但港交所（388）千祈要借鑑呢次事件，貫徹審慎作風，做好把關工作。久而久之當美國再發生多幾次交易混亂，香港就能突圍而出。
胡孟青