歐洲危機席捲全球，好多人都問，會唔會好似美國搞出嚟嗰壇金融海嘯咁，牽連全球。股王A深入淺出咁解釋，歐洲就好似無綫劇集裏面嗰啲大家族，兄弟眾多但各懷鬼胎，個個唔齊心。德國就係大佬，最醒最掂，但成家立室，家庭壓力兼細佬唔生性，所以究竟家族有難佢幫唔幫，好難講。
買手袋學「套戥」
歐洲經濟危機會唔會推冧全球股市以至經濟？呢個問題固然多人關心，但敏妮嘅姊妹就比較關心歐元問題，因為敏妮姊妹每年換季都會去歐洲入貨，歐元升跌佢哋特別敏感。歐元兌美元上星期已跌穿1.22美元4年低位，究竟仲會唔會再跌？市況越差，專家唱得越淡，所以有人預測歐元會跌到落一算，完全可以理解。姊妹聽到歐元會跌到一算，即刻瞳孔放大，話如果等多幾個月先跌就「正」，何解咁講？原因係過幾個月到換季，通常有折扣，加埋歐元跌，掃批名牌袋返嚟香港，自用之餘最重要係喺二手市場出售，賺價再賺埋滙水。
不過歐元跌得多，佢哋可能已經等唔切，其中一個姊妹話，趁過兩個星期出trip，先掃兩個LV返嚟放。講開又講，姊妹呢招其實咪就係經濟學上嘅「套戥」，即係善用同一產品喺兩個地方售價嘅差異，喺賣得便宜嘅地方買，賣得高價嘅地方沽。都咪話港女只係購物狂，實際不知幾有商業頭腦！
溫敏妮
http://wanmanli.com/blogs/