好快就係六四21周年，支聯會噚日舉辦一年一度嘅「民主風箏行動」，去西貢大澳門放紙鳶。八方估唔到，個活動唔單止吸引到一直爭取平反六四嘅市民參加，連民建聯嘅「支持者」都嚟捧場。真係民心所向，可見一斑。
支聯會噚日喺大澳門凉亭擺檔，呼籲嚟放紙鳶嘅市民，簽名支持平反六四等訴求，並且即場售賣每隻十蚊嘅紙鳶，市民嘅反應都唔錯。
要着數唔代表忘公義
正當支聯會嘅義工同活動參加者努力將「民主風箏」放上天之際，突然有人手持民建聯支旗仔，帶領過百個街坊殺到。
呢個時候，八方以為民建聯呢排被人踩場踩得多，知道支聯會喺大澳門放紙鳶，特登走嚟踩場。但睇真啲，只見呢支民建聯隊伍每個成員心口都掛住個名牌，原來係民建聯荃灣支部、民建聯荃灣區議員張浩明舉辦嘅「荃心頌親樂逍遙」一日遊活動。
有一日遊嘅團友睇見支聯會放紙鳶放得咁落力興奮，都忍唔住幫襯支聯會買番隻平反六四紙鳶。呢啲團友雖然參加咗民建聯嘅「着數團」，但要咗着數唔代表要忘記公義，佢哋秉承香港人靈活變通嘅獅子山下精神，照樣簽名支持支聯會爭取平反六四嘅訴求。
有團友仲竊竊私語，感慨六四事件咁快就已經21年；亦有團友接過紀念六四嘅資料，有啲怕唔好意思咁捲埋塞入袋，仲話華叔同李卓人都有嚟呀。
大聲公呼籲市民簽名
正在抗癌嘅華叔噚日精神好好，睇見呢班民建聯團友咁支持，好氣定神閒咁展露笑顏。阿人亦好識做，冇當面多謝民建聯帶班街坊嚟捧場，只係用大聲公呼籲一場嚟到嘅市民，買番隻民主風箏，簽番個名，支持平反六四同受壓迫嘅維權人士。有支聯會嘅義工就比較主動，居然嘗試搵民建聯嘅義工做思想教育。
mailto:[email protected]