曾特首竟然向余若薇議員下戰書，邀請余議員在六月十七日下午六時半至七時半在中區政府合署新翼會議廳辯論一番，消息一出，轟動全城。當日係五月二十日星期四，中午時份，大記者剛好約咗退休議員Ｗ在上海總會吃午飯，退休議員Ｗ過往做過中文大學辯論隊嘅教練，精研議會程序，大記者自然問佢：「買邊個？」據講議員Ｗ睇好余大狀，有兩大理由：（一）女人夠靚，夠身高，在電視出鏡一定贏得觀眾好感，男人冇得揮，除非男方係金馬倫、克萊格之類靚仔，即《經濟學人》所講Unnecessarilygoodlooking；（二）余女士係資深大狀，辯才無礙，而且出慣法庭發言，反應敏捷，應該好過曾特首。
咦，如果專家有此意見，曾特首豈非輸梗？幾位朋友講開，幾乎壓倒性贊同退休議員Ｗ嘅意見，如果以足智彩方式表達，曾蔭權係主場隊伍，余若薇為客，賠率會為2.5:1.8，客隊佔上風，買客勝。朋友們認為，余若薇有民主女神形象，公民黨有好多教授學者教路，而且係知名大狀，受過直選洗禮，公開辯論點都會好過一向做慣「老闆」高官嘅曾特首。不過唔會一面倒嘅，始終曾先生係推銷員出身，推銷員唔識講服客戶，晨早被炒啦，佢今次之大膽主動出擊，唔怕輸咗面懵、民望插水，算係咁嘞，勇氣分都會賺番多少啩？
大記者話好多人都唔明白曾特首喺邊度得到如此政治勇氣？佢睇余若薇記者招待會，觀看到余大狀直情喜上眉梢，從超低投票率（17.1%）帶來嘅沮喪中彈跳而起，覺得曾特首親身送魚腩上門，多謝都嚟唔切！大記者猜測：「莫非到時曾特首會有神秘王牌？」呢樣真係難諗，曾特首唔派手下大將與議員辯論，一開波就自己親征，確係有啲不按理出牌。我哋唔理得咁多咯，總之希望曾余兩人能談妥辯論規則，玉成其事，等我哋有好戲可睇，至於誰勝誰負，與立法會通過或否決政改方案，暫時睇唔到有乜關係。香港政治人物鍾意各持己見多於傾向妥協，一場辯論唔會改變呢個現象。