創立巨人集團倒下又東山再起嘅內地富豪史玉柱（圖），早兩個月學股神畢菲持拍賣午餐時間，3月中開始五日間已達66666元人民幣，最近再update報價，至今已去到189萬人仔，即係同佢食餐飯一粒鐘要成63萬。
史玉柱嘅飯局拍賣要到下月15日先至結束，據負責呢次拍賣嘅優米網估計，飯局應該可以好快去到200萬元人仔。
史玉柱嘅價，同畢菲特當然冇得比。股神2000年推出佢個飯局拍賣以來，喺2008年拍出211.01萬美元嘅歷來最高價，當年就係由嚟自中國內地嘅私募教父趙丹陽投到。
舊年因為金融海嘯後冇耐，拍賣價只得168萬美元，即係有成1310萬港銀。今年係股神第11度拍賣，安排喺下月6日至11日喺eBay競投，個市好番，唔知可唔可以再破紀錄呢？
李華華