呢排天氣時好時壞，有時仲好潮濕，搞到洗完啲衫唔係咁易乾，有friend話近嚟興用一種衣架式乾衣機，外形好似啲帆布衣櫃咁，裏面就放咗部電動吹風機物體，吹出熱風，將啲洗完嘅衫掛喺入面，再拉埋拉鏈，就等佢吹乾。
淘寶達人Susan同小妹講，呢部嘢街價大約幾百至一千蚊，佢見到淘寶網有差唔多嘅衣架式乾衣機賣，連埋內地運嚟香港費用都係200蚊度，所以就訂咗部自用。不過送貨到嚟就發現，吹風機摩打鬆咗，「因為賣家講明有壞包換，所以上網聯絡佢叫佢換番。」Susan話，對方最後都肯換，仲會包埋再送到香港嘅運費，但Susan最終決定唔換。
留意電器是否合港規格
「因為我要負責送返大陸嘅運費呀。」Susan解釋，原來香港運費相對比內地貴好多，「我寄番部嘢返上去要120蚊，差唔多可以訂過第二部。」佢話有朋友之前都試過買三對鞋，內地運嚟香港大約45蚊，點知運到嚟size唔啱，但運上去換，費用都要120蚊。
小妹奉勸大家，買電器都係小心啲好，最好搵有信譽舖頭，同埋喺香港有保養至夠安全，至於大陸版電器係咪符合香港安全規格亦要考慮埋。Susan都話，喺淘寶一類網站購物始終有風險，雖然大部份賣方話明有問題包換，但香港買家運返去費用貴，所以等於冇講過，買之前要諗清楚。
電郵：mailto:[email protected]