女人專用手機　內白到外

幾時都講女人嘅消費能力係最強！佢哋除咗對化妝品、靚衫有興趣外，對好多電子產品亦一樣有要求。唔信？最近Samsung推出一部主打女性用家嘅DivaS7070C就係證據，雖然唔算係頂級智能手機，不過憑住內外都咁女性化嘅Design，加上可拍Beauty同Lomo嘅影相模式，女士們見到點會唔心動呢？

記者：許福合
攝影：梁細權
Model：Suki@PureModels

鑽石形功能掣

第一眼見到呢部S7070C，正放在跟機嘅機套內，已經覺得「好女人」，白色嘅皮套，配上個小巧機身，非常的骰，最特別仲係個機背，用上白色菱形格紋，拎上手手感非常特別，機面有個2.8吋靚芒，有觸控功能，芒底仲有個鑽石形按鍵，雖然唔係真石，但對女士們亦有一定吸引力，實際用起來似乎就唔及一般功能掣方便，不過還好大部份操作都可直接篤芒操作，而3頁式TouchWiz介面，反應速度都幾好，又可以放Widget，最特別係用上可愛嘅蛇仔形字體，介面咁Cute實唔覺得悶蛋啦！

■影相模式內置多種濾鏡特效。

願望列助你實踐

好多女士對購物特別感興趣，不過有無試過太多嘢想買，多到唔記得呢？怕忘記的話，可以試吓S7070C內置嘅ShoppingBag購物袋功能，可以將打算購買嘅物品記低，仲可以分類、記下售價同購買優先次序㖭！有時未能立即買到嘅新衫新鞋，可先用願望列記低，再加埋圖片，日日對住佢願望都隨時成真！相機雖然只有320萬像素，不過可玩性可媲美一般DC，例如具備一笑即拍，全景及多種場景模式，而拍完相片又可經過後期處理，加上特別效果，我就最鍾意Beauty同Lomo效果，前者啱影靚人，後者有唔同感覺嘅Filter，好有味道。