職工盟今年踏入20周年，秘書長李卓人噚日同新一屆執委與傳媒茶敍，講吓下半年有乜慶祝活動，頭炮係10月出書，介紹本港工運人物，已經請咗八方前行家譚暉同陳惜姿執筆。
咁值得紀念嘅日子，當然唔少得齊齊擦番餐，20周年晚宴鐵定10月底喺旺角倫敦酒樓舉行。阿人講笑話，20周年喺倫敦搞，30周年嘅時候就會移師北京，八方都希望真係有咁嘅一日，到時一定親身飛去北京見證呢個歷史時刻。
除咗慶祝，工盟今年訂下唔少大計，爭取最低工資33蚊唔使講，佢哋仲希望會員人數最少有一成增長。另外，工盟喺08年立法會選舉只係出選新界西，阿人話考慮嚟緊新界東都派人參選，但資源有限，所以仲要計吓數。