「維園阿哥」任亮憲噚日又去《城市論壇》，會前會後都同政壇元老李鵬飛咬耳仔。原來飛哥同任亮憲爸爸任善寧喺回歸前做立法局議員時期都算幾老友，飛哥特別託任亮憲問候佢伯爺，又大讚呢位世姪口才好，「希望佢可以多啲為民主出力」。
維園阿伯人數大減
積極考慮出選南區薄扶林嘅任亮憲同八方講，公民黨同民主黨都有意派人出選，所以三黨下月7號會搞協調會，傾人選。何解泛民咁多人想選？任亮憲分析，皆因過去歷次選舉，薄扶林選區都屬泛民票倉，得票均高於六成。任亮憲建議，泛民可以先搞一個陣內初選，透過公開辯論，睇吓各候選人嘅水平，同時可以增加該區選民嘅投票意欲，要踢走保皇派都會易啲。
維園阿哥噚日又出招，踢爆因走去做特首辦七萬幾筍工、不惜辭去區議員一職嘅葉劉智庫成員陳岳鵬，當年參選政綱係促成2012雙普選，指選民嚟緊一定要帶眼識人。
建制派保皇黨噚日冇派代表去論壇做嘉賓，但現場一樣好熱鬧，惟獨到場嘅維園阿伯人數大減，連主持謝志峰都話，佢一向喺高牆同雞蛋之間企喺雞蛋嗰邊，噚日阿伯係雞蛋，因此特登畀多啲發言機會阿伯。