「東涌塊地賣得差，樓市即刻水盡鵝飛。睇樓客少咗，叫價保守咗，不過業主都肯減。」無論樓價高低，經紀K都有生存的方法，做他們那一行，最怕是沒有交投的日子。
「你點睇後市先？如果仲有得跌，梗係等下先啦!」世民最愛看有利益衝突的人自圓其說。
經紀K：「個市唔係升就係跌，又有邊個可以百分百肯定未來會點？就算可以肯定話未來一定跌，全民睇淡，市場價格其實都已經反映咗大家對後市嘅評估。住屋係人嘅基本需要，只要自問無還款能力問題，遇到一件心頭好，點解唔可以買？」
買樓非理性行為
世民：「上星期，夾屋貨尾最終揀樓，四十倍超額認購，不過四成半買家直頭放棄，又點解釋先?」
經紀K：「排隊填表都冇成本，畀我合資格都會博一博。不過，到咗要真金白銀交易，考慮自然唔一樣。好似將軍澳叠翠軒，你話係新樓，不過，大大話話放響度都十年有多，而且當年傳出過質素同結構都麻麻哋。同區私樓都只係貴少少，配套又比較齊全，買家又點解要擇夾屋呢？」
世民：「睇報紙訪問夾屋買家，佢哋講咗明覺得個市可能會跌，不過又怕錯失機會就上唔到車，真係唔明佢哋嘅邏輯。」
經紀K：「睇開啲啦，買樓好多時都唔係理性行為，講到尾都係花錢買心頭好。如果唔係，點解發展商又搞咁多小動作？個個都好似你算到咁盡，我哋呢行粥水都冇啖好食啦。四叔個仔都用十八億高價拍咗塊地啦，又唔見你咁多嘢講？人家負擔得起，你理得人咁多做乜？」
利世民
http://hkliberty.wordpress.com