無綫新劇《談情說案》今晚首播，只係劇集都未出街，唔少心水清嘅劇迷只係睇咗預告片，就已經質疑內容有抄日劇《神探伽俐略》嘅人物橋段之嫌。
故事似日劇
噚日一班演員去到奧海城宣傳為套劇造勢，林峯喺劇入面同福山雅治喺《神》劇一樣，都係飾演一名物理學教授，專係用物理學原理嘅知識嚟幫警方查案。
故事嘅發展仲話林峯會同女警楊怡因為查案搞到發生感情，呢條橋同《神》劇福山雅治跟柴崎幸查案查出感情，可謂一模一樣，至於最唔同嘅戲份，就係加咗馬國明同廖碧兒呢對只係用性慾嚟維繫關係嘅現代愛情故事。
講番噚日個宣傳活動，現場搞咗個頒獎禮，風頭最勁嘅係馬國明，因為佢得到「最花FIT男」嘅獎項。
妒忌到出面
現場仲即時播放馬國明喺劇入面同多個靚女嘅床戲，當中梗係佢同廖碧兒嘅床戰呢一幕最激啦！連林峯都話好妒忌馬國明有咁多女仔投懷送抱，林峯仲話：「佢（馬國明）一套劇等如我十年加埋咁多呀。」
馬國明喺劇中扮演嘅型爆神探，身邊女伴轉唔停，問到佢覺得邊個最好咀？馬國明好老實咁話：「我唔敢講，除咗咁多靚女外，我喺戲入面連有易服癖嘅男人都唔放過，不過錫男仔都冇想像中咁尷尬，馬國明仲鬼馬咁話：「我覺得都幾enjoy喎！」