名模陳嘉容昨日在銅鑼灣出席「修身堂醫學美容纖體分享會」活動，暢談減肥及扮靚心得，談到減肥算是她長期作戰目標，除了因為模特兒工作需要保持美好身段之外，也關乎個人愛美的心態，故她任何時刻都以最佳狀態示人。
陳嘉容說：「我家120磅，都維持咗5、6年，減肥唔辛苦，keep至最難。我好鍾意食甜品，試過有次去歐洲，狂食甜品、麪包，一個trip就重咗7磅，自己又為食，所以覺得要忍口減肥都幾慘，不過我好貪靚，將來就算嫁人唔做model都唔會畀自己變肥婆。」
做高溫瑜伽
陳嘉容的減肥方法是忍口節食再加做高溫瑜伽，她說：「早餐會食得多啲，一碗麥皮、兩份水果、一杯奶、兩個蛋白，午餐食碗淨雲吞加碟菜，夜晚通常飲碗湯加碟菜，唯一嘅運動係做高溫瑜伽，跑步唔啱我，之前YogaYoga都有免費贊助我，家執埋，好彩仲有其他贊助。」
採訪、攝影：魯萍