小妹係電腦白癡，成日上網都中毒，噚日又中招啦，仲俾姨甥仔笑，話我嘅防毒軟件一早過咗期，唔中毒就怪。俾小魔怪笑梗係唔服啦，即刻搵消委會老友問吓有乜嘢好介紹。
老友話，消委會啱啱測試咗巿面14款防毒軟件套裝，同埋4款防惡意程式軟件，比較佢哋嘅使用方便程度、運作速度及資源佔用，同埋防惡意程式效能。樣本檢測咗4400種檔案病毒等，發現冇一個軟件百分百偵察到所有惡意程式，各樣本偵測度由56%至97.3%不等。防毒軟件套裝以Symantec嘅NortonInternetSecurity2010總評分最高達4星（最高5星），預設狀態理想，檔案掃描速度快，對惡意網站嘅防衞較周密。一年期網上下載價$249。
防毒軟件也有平靚正
BitDefender嘅InternetSecurity2010總評排第二都唔差，使用方便，誤判率低，一年期網上下載價要$249。總評排第三Kaspersky嘅InternetSecurity2010就平靚正嘞，三年期網上下載價$398，平均每年只係$132。
老友教路，個人用戶唔追求最高度、最全面嘅保安效能，而本身電腦操作系統又已經內設咗防火牆，其實可以選擇一啲唔使錢防惡意程式軟件都夠。消委會測試咗4款免費防惡意軟件，總評分由3星至3.5星不等，評分比部份付費嘅防毒軟件套裝仲高，排名榜首Avira嘅AntiVirPersonal-FreeAntivirus，預設狀態理想，開機延長時間同資源佔用不太多，防毒效能好。
電郵：mailto:[email protected]