補選拉票最忙碌的時候，陳淑莊每天從早到晚站在街上，不是派傳單就是嗌咪，幾乎沒有閒下來的時候，在累得昏天暗地的日子，還得忙着搬家。單身女子，搬屋五次，一個人住第10年。
她是家中獨女，自小便是媽媽與外婆的掌上明珠，離家獨居事出突然。「因為同婆婆嗌交，一氣之下便走了。」現年38歲的陳淑莊說，那時一向疼錫她的婆婆忽然性情大變，從沒罵過她的婆婆，卻因小事大罵她，第二次無緣無故罵她的時候，她氣得雙拳狂打在門上，「兩隻手打到瘀晒，當晚就搬走咗。」
「我唔想家無寧日，所以就搬出嚟住。」
疑似離家出走，媽媽無可奈何，「我唔想家無寧日，所以就搬出嚟住。」後來家人逐漸發覺問題似乎不在這個女兒身上，而是婆婆有些問題。「婆婆有時會望住部冇開嘅電視機三個鐘頭，又用5,000蚊買嚿石頭話係寶玉，一次過買半打豉油，好得人驚。」後來聽朋友轉述老人精神科醫生建議，一家人才擔心婆婆可能有病，「我哋同佢話一齊遊車河，其實係帶佢見醫生。」
看醫生後，證實婆婆患了老人癡呆症，要即時入院。「其實我哋對呢個病認識好少，否則唔會嬲咗婆婆，搬出去住。」離家的女兒回來了，婆婆卻住進了醫院。婆婆最後的一段日子多數住院，回家，也看不見婆婆了。
離家一個人住像單程路，很難走回頭，陳淑莊後來還是搬出老家，落腳上環。女兒要獨立，最緊張的是媽媽。陳淑莊說，當時媽媽還陪她一起買新傢俬，選購大床、鞋櫃。搬家瑣碎事多，她愛親力親為，「我唔鍾意幅牆顏色，問業主可唔可以自己髹第二種色，佢話冇所謂，我就買罐白色油，自己髹漆。」
「踩在凍冰冰瓷磚上面，覺得好凄凉。」
大部份人日出而作，日入而息，住在租來的地方，沒有甚麼要求，陳淑莊不同，選擇新居首要條件，是一定不能鋪地磚，「之前有次好急搵地方搬，租咗北角一個單位，冬天返到屋企，踩在凍冰冰瓷磚上面，覺得好凄凉，尤其係嗰陣時生活好低潮，一個人喺屋企冷冰冰，好難過。」另一些要求，很個人化，「我搬入新屋，一定要做新窗簾，今次搬屋，新單位窗台好大，花咗幾千蚊做窗簾。上次間屋啲燈掣，我覺得唔順手，通通換過。」
搬屋多次，陳淑莊自言是熟手搬運工人，「我一隻手可以拎起兩大袋衫，一次過拎四袋。」「去宜家買櫃，店員問我有冇人幫？我話冇；有冇揸車？都冇。一個人搬走件貨去搭的士。好彩嗰時有健身，夠力做呢啲粗重嘢。」
「病咗冇人理時都好慘…冇得依賴人。」
有些人住的地方越大，收藏的雜物、舊物越多，經常搬家的人，反而知道空間最矜貴。陳淑莊說每次搬家，也是清理雜物的好機會，舊的、冇用的東西，不要帶到新居了。當然，有些身外物還是捨不了，「今次搬屋，先發現仲有幾千張上次選舉未派晒嘅單張，屋企總共有六個易拉架。幾次選舉企喺街上，就係佢哋喺我身邊。」
獨居的好處，就是不用多向家人交代起居作息，自由自在。「住灣仔汕頭街時，單位大窗對正修頓球場個大鐘，嗰時屋企入面唔使擺鐘，望出街就知道時間。」一個人在家，雖然快樂得無時無刻，但總有付出代價的時候。「有時飲大咗，返到屋企要擺個垃圾桶喺床邊，因為驚嘔到一地都係，要自己抹番。病咗冇人理時都好慘，打開雪櫃乜都冇，自己住，冇得依賴人。」
住在灣仔多年，搬來搬去方圓不出汕頭街、基利臣街、李節街，「之前住李節街，住在樓上係做肉檔，鄰居係快樂餅店老闆，大家平日都成日會見面，覺得人同人關係好近，住喺一個社區耐咗，係會有感情。」這次再搬家，是因為業主收回單位自用，物色新居首選灣仔，「呢次租嘅地方，喺一條斜路上面，比較清靜，同以前住近大街都幾唔同。」
「星期六下午坐喺屋企，感覺好舒服。」
這個單位，她前後看了四次才決定簽租約，「自己睇兩次，一次同男朋友嚟，一次帶媽咪上嚟。」原來她每次搬新屋，都必定要媽媽過目，若媽媽不點頭，不會貿然拍板。「今次有兩個單位揀，我心大心細，都係由佢哋揸主意好啲。」新居外望山景，好天氣時滿眼綠油油，可以看到在山徑緩跑的人，「有個星期六下午坐喺屋企，感覺好舒服。」入伙約一個月，她笑說仍有些不習慣，「有時朝早竟然會俾雀仔嘈醒！」
十年五遷，新居處處不同，有兩件家具一直跟身，就是十年前與媽媽一同買的床與鞋櫃。一個人住，其實也可以與家人在一起。記者羅偉光