暑假快到，小妹又要幫姨甥仔安排吓活動，見到個小魔怪呢輪追睇電視劇《吸血新世代》，一於帶佢跟世界自然基金會香港分會，夜探米埔找尋真嘅吸血鬼，就係蝙蝠嘞，不過香港啲蝙蝠唔會吸血嘅。
世界自然基金會香港分會嘅靚女傳訊主任Melanie話，今次全新嘅米埔午夜歷奇導賞團，玩足五個鐘，由專業導師帶領，約傍晚5點出發到米埔自然保護區，先睇吓日落同月出，成群鳥飛返棲息地休息，場面都好壯觀o架。一入黑，就會入去探索紅樹林同埋淡水基圍入邊嘅夜行動物，好似黑眶蟾蜍、飾紋姬蛙同豹貓等。
儀器有助知道種類
Melanie話，戲肉當然係搵蝙蝠，呢個係全新環節，第一次攞啲蝙蝠探測儀畀團友使用，喺黑麻麻嘅森林尋找蝙蝠嘅蹤迹，透過儀器仲可以知道佢哋屬於邊種蝙蝠。
Melanie話，午夜歷奇導賞團今個月至8月逢周六舉行，另5月30日、6月13日同27日三個禮拜日加場。詳情登入網址 http://online.wwf.org.hk/booking，或致電24713480。
電郵：mailto:[email protected]