選舉時口號「做嘢最實際」嘅民協，做地區工作百無禁忌，幾年前開始搞社企，三行工程、清潔、按摩幾瓣業務都捱得住，稍後可能有新搞作，如果成事，相信創本地政黨先河。
可帶團參觀棺材廠
民協嘅馮檢基同八方講，依家同一間殯儀公司初步洽談合作做殯儀服務。政黨搞旅行、蛇宴無日無之，乜家連身後事都要做埋呀！基哥話人口老化，睇好呢類生意有得做，佢個如意算盤係利用民協數以千計嘅長者網絡，介紹身後事套餐畀佢哋，但唔包落葬，「可以舉辦柳州旅行團參觀棺材廠，又或者示範唔同宗教喪禮儀式，俾老人家睇吓鍾意點辦後事。」
基哥話提供一條龍殯葬服務呢個構思醞釀兩年，早前向民政局「伙伴倡自強」社區協作計劃遞交計劃書，向政府申請基金開辦殯儀社企，點知被打回頭。「佢哋指個計劃提供社區服務為主，營運上唔可行。」雖然被潑冷水，不過基哥未死心，會同有意合作嘅殯儀公司商量，「睇吓可唔可以喺有限投資額下試做，如果有得做，就正式搞。」
基哥指社企唔係為賺錢，而係有實際需要。原來民協一年都要出錢出力搞幾次白事，因為有啲長者無親無故，過身後無人辦後事，街坊會搵民協幫忙。「搞咗咁多次，已經有幾個相熟嘅喃嘸佬，體面咁送老人家最後一程。」有見好多老人家冇計劃身後事，基哥認為有商機，「如果殯儀社企可以自負盈虧，就有資源幫到啲無親無故又冇錢嘅長者辦最後一件事。」
咖啡店或7月開張
殯儀社企仍在醞釀階段，民協間社企咖啡店終於有眉目，搵咗半年舖位，基哥今日終於簽約，新舖位於紅磡，接近工廠區，若一切順利，最快7月可以開張大吉。
呢間社企獲兩年共72萬元「伙伴倡自強」基金，同一位咖啡界老行尊合作，基哥話有信心兩年內自負盈虧。開咖啡店只係第一步，基哥話日後可以開course，教中產冲調、品嚐咖啡，仲可以培訓從業員。
搞三行年做五百萬生意
香港政黨拉攏街坊，蛇宴旅行團必不可少，民協連殯儀服務都有興趣染指，與其他政黨比較，確係十分進取。民協搞社企已有八年歷史，透過民協社會服務中心做街坊生意，最先成立係三行工程公司，當年原本係再培訓三行工人幫佢哋轉行，點知三行工人不願放棄多年手藝，基哥笑言是為勢所逼，「民協惟有膽粗粗借幾十萬元出嚟搞間公司。」
民協社企僱用百人
呢間三行公司現有30幾個工人，經濟好轉，生意應接不暇，「我係主席，想搵佢哋維修屋企都要排隊。」佢透露去年營業額有450萬元，今年預計達500萬元，「應該可以還錢畀民協。」連同清潔同按摩公司，民協社企僱用大約100人，雖然規模唔算好大，總算創造就業機會。
其他政黨冇大搞社企，據知民主黨曾低調做過，但不成氣候；民建聯主力搞蛇宴就得，何必身水身汗搞社企？自由黨咁多大老闆支持，派錢畀街坊都仲得，搞社企？No啦！
mailto:[email protected]