網絡廣告戰由政府新一波軟銷政改〈信任讓夢想成真〉揭開序幕,網民開turbo惡搞個廣告,百花齊放蔚為奇觀,八方喺Youtube發現有條〈有得食好過冇得食〉短片,擺到明同政府打對台。
短片上載兩日,內容好簡易,就係將一堆糞便狀物體,放入微波爐翻叮,叮完之後,加兩條菜做伴碟,就上枱奉客,擺在你面前,食唔食落肚,隨便。相信唔使八方花筆墨解釋,大家都知道呢條短片表達嘅係乜嘢意思,製作短片嘅人,加咗句註腳:「政府話,有得食好過冇得食,請支持狗屎垃圾方案。」政改方案有幾「正」,大家自有判斷,八方覺得既然內容爛到不堪,無論如何翻叮都不能改變內涵,好難啃得落囉。