前學運領導王丹（圖）有新動向，去年台灣政治大學聘任佢做台灣史研究所助理教授，教〈1950年代兩岸國家暴力比較研究〉課程，事隔一年，佢喺自己個微博透露，下個學期會去台灣清華大學教書。
台灣清華大學人文社會學院最近通過聘任案，正式聘請王丹做客座助理教授，如無意外今年9月會由政大轉去清華，不過只係任教一個學期。王丹冇詳細講去到清華會任甚麼科目或具體工作範疇，不過佢專業係歷史，相信都會教老本行。
今年係六四21周年，王丹本年初同多個海外民運人士發起「網路革命宣言」，呼籲包括港澳台在內中國4億網民以暢所欲言方式發起「網絡革命」。