近年喺荷李活發展嘅MaggieQ，喺當地發展得相當唔錯，近日佢仲擔正做女主角，演出改編自法國大導演洛比桑（LucBesson）經典電影《墮落花》（Nikita）嘅同名電視劇。新劇片段日前喺網上曝光，MaggieQ繼續做打女，唔少得有性感造型啦。
首位亞裔女星擔正
拍過《職業特工隊3》（Misson:Impossible3）等大製作嘅MaggieQ，為美國CW電視台拍攝新劇《墮落花》，係首名亞裔女星擔綱主演美國劇集主角，非常威水。噚日佢同劇中演員一齊喺紐約宣傳，雖然兩個月前MaggieQ曾經話過佢喺《墮落花》中唔會開殺戒，但喺啱啱曝光嘅片段中，佢已經好狠勁咁開槍殺咗幾個敵人，仲用唇膏做遙控器，引爆炸彈！加上佢一身低胸短裙，夠晒官能刺激。
《墮落花》故事係講一個反叛少女，俾美國秘密組織改造成特務殺手，但後來卻被追殺，劇中MaggieQ仲會同男主角ShaneWest有感情戲㖭。