一年365天，藝人有不少時間要拍戲唱歌四圍飛，眼前出現過的人、事及景物，難免是過眼雲煙，因此梁詠琪（GiGi）無論在香港抑或旅途中，都選擇以相機去記錄事物，近年較多用Canon的G10及Panasonic的數碼相機四處獵影，她說：「有啲地方同人，可能之後再冇機會接觸，所以我希望用相片將呢啲記憶記錄落嚟。」以相片作記錄，既簡單又直接，沒有任何假象造作。 撰文：麥佩儀
悠然一刻
「人在旅途，坐喺窗邊睇風景，嗰一刻好寧靜，好relax，其實做嘢忙咗一日，可以坐喺度乜都唔諗，我好享受呢種悠閒。」
拉薩第一天
「03年去拉薩探訪，當地係高原地方，天同地感覺好近，天上嚿雲好似個陀螺喺地下轉到飛上天。」
丸之內之夜
「上年我喺日本拍電影《肩上蝶》時影，當日我踩單車去到丸之內，嗰度有好多巨型嘅藝術擺設。」
黑雲？白雲？
「唔好以為我整咗特別效果，我喺美國隔住塊玻璃影出去，塊玻璃就係有個黑框，製造出有趣嘅畫面。」
頓珠
「呢個小妹妹係我返內地探訪時遇見，佢叫頓珠，雖然佢係智障但無損佢嘅童真，表情多多。」
害羞泛紅霞
「呢個天空喺飛機上影，望出去見到呢片紅紅哋嘅彩霞，好似一個怕醜女仔面紅紅嘅面色咁。」
樹影、光影、水影
「嗰日喺日本嘅公園畫畫，一眼見到個水影當中有埋樹影同光影，三樣嘢加埋一齊效果幾靚。」
紅
「我去西藏探訪有機會參觀寺廟，西藏喇嘛嘅服飾通常都係紅同黃，一眼就被好鮮艷嘅紅色吸引住。」
