連串以一代武術宗師葉問為題材的武打電影陸續登場，正在上映的《葉問2》票房雖然火紅，但該片近日被葉問長子葉準戳破劇情「一成真都冇」，又指甄子丹的詠春唔正宗。另一套由葉準徒孫杜宇航孭飛的《葉問前傳》即將上畫，獲葉準破例客串一角，葉準愛徒兼該片出品人冼國林更強調片中全是真功夫拍攝，不像《葉問2》靠特技效果。
甄子丹主演以一代宗師葉問為題材的電影《葉問》和《葉問2》，先後炒起詠春熱潮，葉問現年86歲的長子葉準是該電影系列的顧問，但他日前接受本報訪問時篤爆《葉問2》劇情一成真都冇，又直言不滿甄子丹演繹其父時加入自己性格，並指甄子丹片中所使的詠春不正宗。
「我哋賣嘅係真功夫」
葉準對甄子丹滿腹牢騷，對愛徒冼國林身兼監製、出品人和武術總顧問的新片《葉問前傳》卻撐到盡，還難得粉墨登場，扮演葉問第二位詠春師傅梁壁，葉問一角則由葉準徒孫杜宇航飾演，兩人更在鏡頭前過招，該片將於下月24日上映。
有消息指冼國林因另起爐灶拍《葉問前傳》，導致與東方電影老闆鄭強輝不和，冼國林昨日在電話中否認說：「絕對唔會，我同鄭生仲係好朋友，我要專心拍好《葉問前傳》先冇參與幫手《葉問2》。」外間有傳甄子丹與冼國林不和，他昨日承認拍完《葉問》後沒跟甄子丹聯絡過，說：「我哋好耐冇傾過偈，《葉問前傳》就嚟上，唔想呢個時候講，俾人覺得我做宣傳。」
《葉問前傳》緊接《葉問2》之後上映，冼國林直言唔怕貨比貨，他說：「我對杜宇航好有信心，我哋部戲賣嘅係真功夫。」若29歲的杜宇航與46歲的甄子丹比較，誰的拳腳功夫較優勝？冼國林說：「杜宇航18歲就攞武術比賽冠軍，但無可否認子丹銀幕上模仿力好強，《葉問》我教咗佢十堂，佢就打得似模似樣，觀眾喺銀幕上好難分到真功夫，而且子丹都成50歲，同20幾歲嘅杜宇航比較就唔公平。我哋詠春派同門睇過《葉問2》，睇得出佢哋特技效果比較多，我拍打戲就堅持多啲真功夫。」
自稱前傳七成真實
冼國林指《葉問前傳》有兩大秘密武器，其一是故事內容至少有七成真實，其二是成功游說師傅葉準粉墨登場，問到葉準的片酬會否比他做《葉問》系列的顧問費多時，冼國林笑說：「師傅嘅片酬肯定多過顧問費，但其實唔可以用錢衡量，因為師傅係無價寶。」
採訪：比華利