傳聞中的林建岳新歡Michelle於2008年12月在銅鑼灣為日本品牌MaisonGilfy開設概念店，她近日似乎水漲船高，昨日於尖沙嘴再開分店，座落LCX1,700呎的新舖正式開張，雖然老闆娘人不到，但親自請了Angelababy撐場剪綵。
林建岳早前宣佈兩年前已跟女友陳浥萍（Monica）分手，剛巧其傳聞中的新歡林寶賢（Michelle）兩年前在香港開拓日本服裝品牌MaisonGilfy，品牌概念店開完一間又一間，2008年在銅鑼灣開設專門店，最近又落重本在潮流集中地尖沙嘴海港城LCX租用1,700呎開設新舖。
性感Model助陣
昨日新舖開張，不知老闆娘是否怕被傳媒追問跟林建岳的兩年情緋聞，所以玩失蹤，雖然人沒到，但親自邀請在日本人氣高企的好友Angelababy為新舖撐場兼剪綵，更安排多個日本名模性感助陣，氣派十足。
Baby被問到是否認識Michelle，最初她感到愕然，停一停，諗一諗，然後說：「識咗一排，係透過日本經理人認識。」至於有關Michelle跟林建岳的戀情，她表示有留意報道，她說：「話冇聽過呢單新聞就呃你，但係人哋私人事唔方便講，亦唔好意思問。」
雖然Baby跟Michelle份屬好友，Michelle仍然付足酬勞，Baby說：「我冇問過收幾錢，咁今次都係一份工作。」
Baby想財色兼收
眼見好友Michelle新舖開完一間又一間，問Baby會不會羨慕，她說：「咁佢生意好，呢個品牌日本賣得好好，我自己就唔羨慕，我都係想拍多啲電影。」Baby更直言自己喜歡靚仔多過有錢仔，她笑說：「我承認o架！我鍾意靚仔，不過靚仔又有錢就更perfect！」
採訪：楊潔雯
攝影：仇志德