電影《葉問》系列叫好叫座，令傳揚武術精神嘅電影大行其道，同期唔少電影人爭住開拍同類型嘅戲，最新鬧雙胞嘅就有葉問徒弟李小龍嘞，暫時東方電影同星皓公司都想分一杯羮，另外仲有話會開拍名為《李小龍傳》嘅文雋，大前日接受內地傳媒訪問時就話會喺6月底去廣州開拍。
李治廷學詠春
文雋話：「飾演李小龍嘅李治廷已經練咗兩個月詠春，仲安排咗佢去健身、參加跳舞課程。」佢話李治廷同李小龍除咗樣似之外，出身都差唔多，佢哋都係讀國際學校兼講得一口流利英語，仲識廣東話㖭，唯一唔同嘅，李治廷係乖學生而李小龍就唔算係。
文雋話佢喺05年已經有拍李小龍嘅構思，所以唔存在跟風喎！佢話工作人員之前拜訪過李小龍嘅家人，仲喺佢哋手上攞咗過千張珍貴嘅照片用嚟參考。之後又拜見咗一位香港人好熟識嘅老牌藝人俞明，原來俞明同李小龍係表兄弟關係。文雋話：「我上星期去咗見俞明，佢爸爸係李小龍姨丈，今年都已經86歲，佢見到我攞去嗰啲相，先知道李小龍屋企嘅客廳原來係咁樣。我哋套戲有80%嘅情節都係真有其事，真有其人，絕對可以滿足全世界李小龍迷。」
據知，文雋今次仲會自己寫劇本，而導演就會搵葉偉民幫手。葉問鬧雙胞都有咁多是非，馮仁昭又睇吓李小龍嘅故事會唔會又係喺風雨中誕生。