今年係近代護理學創始人南丁格爾逝世百周年，護士節籌委會上星期六舉行咗慶祝晚宴，當晚重頭戲係一場古今護士制服花生騷，行天橋嘅模特兒都係現職護士或學護，估唔到甚有專業水準。
當晚登場護士制服由上世紀至現在着嘅制服都有，部份更加係古董珍藏，山頂明德醫院借出兩套有幾十年歷史嘅制服出嚟，古典味十足，其中一套紫紅色長裙制服高貴大方，隨時以為係禮服㖭。
大會工作人員又特別用一啲醫療用品，好似鹽水樽、尿喉、針筒及隔離保護衣，DIY製成「未來護士」制服，色彩繽紛好似晚禮服咁靚，如果未來啲護士真係着呢啲制服，相信好多病人會寬容好多。