家嘅生活習慣，大家銀包差唔多都有幾張信用卡，方便消費嘛。但積金局行政總監陳唐芷青，卻竟然唔鍾意呢種方便使錢嘅工具，皆因佢有張人肉提款卡。
勝在唔會先使未來錢
呢位積金局陳太噚日同一班行家飯局，自爆話一直冇用信用卡嘅習慣，點解？「我其實用開提款卡嘅。」原來佢以前買嘢找數時，都要走出街攞錢，雖然會惹嚟售貨員些少奇怪表情，但勝在逐次埋單唔會先使未來錢，畀錢之前仲有幾分鐘冷靜期。
但有一次張提款卡突然攞唔到錢，於是先開始申請信用卡傍身。邊間銀行提款卡咁蝦碌呀？咪就係佢老公、金管局總裁陳德霖囉，幫香港人睇實千億外滙儲備嘅陳德霖，原來係「人肉提款機」。陳德霖年薪600萬，做過渣打高層，冇理由係失匙夾萬喎！
積金局今日喺奧海城搞宣傳騷，陳太話早前邀請各政黨議員到場，可惜冇泛民畀面應酬。呢個roadshow由煲呔主禮，早響嘅話，社民連肯定早到。