政府噚日忽然出手，公開邀請公民黨余若薇辯論政改方案，口口聲聲話要凝聚共識、縮窄分歧，明明5.16公投就係凝聚民意、收窄分歧嘅機會，上星期高官仲叫人唔好投票、不要表態，轉個頭就提議公開辯論，表面上尊重民意，實際上踐踏民意，呢個政府都算虛偽兼無恥到極點。
邀請信連身份都搞錯
政府噚日朝早10點半透過新聞處公開邀請信，首次向在野黨下「戰書」，官員都冇做足功課，新聞稿誤稱余若薇為公民黨主席，實情余大狀係黨魁，黨主席係關信基教授。新聞處一個鐘頭發出更正，新聞處網頁11點46分上載嘅新聞稿，冇搞錯余大狀身份。
呢個破天荒特首論壇萬事俱備，只欠一個主持，與其勞師動眾，八方建議移師維園《城市論壇》舉行，原班人馬原汁原味上陣，謝志峰做主持，維園阿伯、維園阿哥馬草泥等自由入場，絕對公平、公正、公開。
煲呔建議論壇在傍晚6點半至7點半鐘舉行，呢個時間正係TVB新聞時間，若然冇咗一個免費電視台直播，好似世界盃咁俾有線獨家玩晒，對好多小市民唔公道，所以最好調整吓時間，將論壇包裝成大show更佳，既然煲呔想凝聚民意，收視率高啲好喎。
曾志偉係大騷司儀中流砥柱，莊諧並重收放自如，由佢主持政改論壇不作他選，收視率有保證，而且佢主持遊戲節目次次都玩到癲，煲呔要玩鋪勁，獎門人一定幫到手。女司儀方面，呢期《荃家福祿壽》當旺，阿姐出馬包保唔會令人失望，之不過佢係政協，唔使開口都知佢撐政府，公民黨未必收貨。
建議禮聘肥彭嚟主持
主持《百萬富翁》備受好評嘅陳啟泰，八方覺得都值得考慮，但係有人認為唔好，事關陳啟泰有錦囊，叫煲呔問現場觀眾，台下卻鬼影冇隻；打電話問朋友，㩒完1823等極都冇人聽，咪盞出事！若然挑挑剔剔冇人合適，仲有個超級無敵主持人，一於禮聘肥彭返嚟主持大局，喺舊老闆面前，相信煲呔都心服口服。
mailto:[email protected]