EX1勁玩Moody　F1.8大圈幫

最近買相機，已經少咗人談論CCD有幾大，反而多咗人會問換唔換得鏡！作為簡單卡片仔DC，SamsungEX1想挑機王之位，自然有把炮在手；雖然唔換得鏡頭，不過支炮仔唔講得笑，最大光圈值F1.8，影人影景同樣一流，仲好夠Moody。

記者：許福合
攝影：伍慶泉
Model：Kayla@PureModels

1/1.7"CCD

純機迷角度睇EX1規格，真係令人流口水！德國Schneider-KREUZNACH靚鏡、24-72mm焦距，超廣角鏡時強玩F1.8超大光圈，就算3倍Zoom盡72mm時，光圈都只係收到F2.4，影風景構圖特別好用，而大光圈在拍攝淺景深效果時更係容易。其次係CCD感光元件，我想講嘅唔係佢有幾高像素，反而係Size達1/1.7"，相較市面一般輕巧型DC真係大好多，直接影響係成像畫質更細膩，同時雜訊控制亦較佳；實試ISO3200，雜訊控制唔錯，可媲美單反水準，轉去ISO800，簡直可當一般卡片機ISO100用！

■德製F1.8光圈鏡頭，兼備24mm廣角能力。

■內置閃燈，㩒個掣就彈出嚟，型到爆。

■手柄上亦有滾輪，手動時就可控制快門。

■雙轉盤設計，毋須下下入Menu轉功能。

■3"扭擰芒，可反轉自拍，畫質仲相當不俗。

AMOLED屏幕

以EX1呢種身形，竟有扭擰芒，令人意外！方便拍攝刁鑽角度，玩自拍更啱；EX1個3"靚芒，亦是愛不釋手！佢使用高階手機常用嘅AMOLED屏幕，優點係對比度高、反應時間快，不過相對成本較高，所以DC上較少見；一般環境下使用分別不大，但如果構圖畫面有強烈光暗對比，咁就高下立見，再加埋DRIMeIII處理器能同時處理光位同暗位，戶外使用就更不受環境所限制啦！EX1仲有其他專業級玩法，如全手動操作、快速操控滾輪、支援RAW格式等，不過較為奇怪係拍片只有VGA質素，以近期相機追求HD趨勢，EX1拍片方面似乎較落伍。