蔡卓妍（阿Sa）與鄭中基離婚後，一直指她有新歡，最近有傳阿Sa拍畢電影《翡翠明珠》，即與新歡外遊度假，阿Sa昨日直認去了杜拜旅行，但表示同行的是朋友與同事，沒有新歡，還打趣問記者有沒有好介紹。
容祖兒、蔡卓妍、「萬寧妹妹」王允祈昨日均得到Yahoo頒發的廣告代言人大獎，昨日她們出席在四季酒店舉行的頒獎禮，台灣模特兒白歆惠就擔任頒獎嘉賓，阿Sa除為自己領獎外，還替身在北京工作未能出席的鍾欣桐領獎。有傳阿Sa在北京拍完戲後，便與新歡外遊，阿Sa昨日謂：「係去咗旅行，我同朋友、仲有同事去，去咗杜拜幾日，好好玩，曬到黑晒返嚟。」朋友當中是否有新歡？阿Sa只笑謂：「你介紹畀我呀，有冇好介紹呀？」
祖兒被萬寧妹嫌棄
祖兒曾經同萬寧妹妹拍過MV，還大讚對方可愛，祖兒欲應記者要求與萬寧妹妹合照，不過看來年紀小小的她已懂同性相拒，祖兒一行埋去她就開始扭計，最後要由爸爸抱走，令祖兒不知所措，祖兒謂：「我都知佢鍾意同男仔玩多啲，上次個MV仲有林峰，不過佢都唔係好抗拒我。」
眼紅阿Sa激咀林峯
此外，祖兒與阿Sa有份主演的電影《翡翠明珠》，二人都分別與林峯有咀戲，祖兒還踢爆阿Sa與林峯激咀，她就只是蜻蜓點水，她說：「本來我都冇咀戲o架，導演臨時加，不過只係嘴掂嘴，仲要hold住喎！都不知幾辛苦，都拍咗好幾個take，我都好幾年冇拍過咀戲，阿Sa激我好多，我拍之前都有問佢林峯好唔好咀，阿Sa話ok啦。」提到激咀，阿Sa笑謂：「邊有好激呀，咪個頭轉咗幾吓咁囉。」
採訪：胡比
攝影：陳順禎
