魚缸暴炒族:有線乾升 有閒錢先買 - 方星俠

魚缸暴炒族:有線乾升 有閒錢先買 - 方星俠

德國禁止無貨沽空,咁樣做好似有計咁款,但查實另一角度即係反映歐洲幕後可能有更大利淡消息,只係唔知點爆,所以先會咁樣出招。換言之,有關舉動似乎欲蓋彌彰。德國咁做係咪好心做壞事?外圍全線散晒,港股不能倖免。
內房股綜觀而論算係硬淨,奈何客觀環境唔就,想彈都有心無力。遠洋地產(3377)低收5.26元,跌6.7%,表現可謂認真失禮!唯今之計,只能按原定策略行事,股價一穿全年低位就打靶,抹眼屎乾淨盲。
似乎今年5月份難逃「五窮」,踏入6月份又係四年一度世界盃,睇怕唔少散戶情願賭波好過炒股。擁有世界盃獨家直播權之有線寬頻(1097),昨成逆市奇葩,股價倒升5%,高收1.22元,不過成交量就好細,只係27萬股左右,只屬「乾升」格局。
有線去年蝕4100萬元,世界盃雖然好睇,但唔保證令公司賺大錢,炒有線最大誘因其實在乎會否獲注九倉電訊?有閒錢不妨買來擺中線,獲利目標1.8元。
方星俠