許志安和蘇永康日前再到加拿大開騷，並乘機四處遊覽，安仔叫好友結伴遊尼亞加拉大瀑布，但出名貪靚的康仔因怕濕身臨陣退縮，結果安仔單拖上船，他形容如面對十號風球全身盡濕回程，難怪一次夠晒數。
同是華星出身的許志安和蘇永康，除了和梁漢文及張衞健組成Big4開騷及主持無綫收費台節目外，其實安仔和康仔十多年前已經孖住開騷搵銀，日前兩人再度以「安康」姿態往加拿大開騷，安仔說：「其實11年前我同康仔已經組成安康做演唱會，計計吓原來今年已經係第11年，咁啱又有加拿大娛樂商搵我哋一齊做騷，當係一個紀念。」
「十足十號颱風」
安仔和康仔在加拿大做完騷，抽空留在當地四處遊玩，安仔提議到世界十大名勝之一的尼亞加拉大瀑布逛一逛，兼且要坐船在瀑布底巡遊，豈料康仔對這提議立即「sayno」，莫非康仔怕水？安仔沒好氣地說：「梗係唔係，因為坐船出去一定會濕身，康仔出晒名貪靚，點可能容忍着住套靚衫由頭濕到落腳呀？所以佢咪一口拒絕我囉。」
結果安仔只好單拖上船，雖然工作人員已派雨褸給每位乘客，但結果無一倖免，全身盡濕而回。安仔說：「十足面對十號颱風咁，但係好好玩呀，果然不枉此行。」至於康仔則只願意留在瀑布頂上跟安仔合照。
問安仔會否帶女友再來欣賞尼亞加拉大瀑布？他笑說：「呢種經歷真係一世人一次就夠啦。」看來他對女友可謂相當細心，無謂要她全身濕透。稍後安仔和Big4其他成員會到美加、新加坡、澳門、馬來西亞及內地等巡迴演出，加上自己又要出碟，一定有排忙。
採訪：麥佩儀