華爾街大行喺風雨飄搖的日子都不忘搞爛Gag，細摩同高盛出報告預測世界盃賽果，細摩好大膽話，計晒賠率同對賽紀錄，英格蘭會再次重溫44年前嘅光輝。高盛仲認真，分析賽程安排同各國排名，話最大機會奪標係巴西（機會率13.76%），其次係西班牙（10.46%）、德國（9.4%）、英格蘭（9.38%）同阿根廷（9.08%）。
睇今屆世界盃，不忘睇睇南非經濟。南非係首個舉辦世界盃嘅非洲國家，亦係歐洲電煤最大供應國，近期爆發大罷工，多日來癱瘓咗鐵路同港口，威脅電煤及鐵礦砂出口。南非國家電力公司警告要全國限電，以免比賽期間停電，令人擔心直播臨入球一刻，會唔會突然停電，漆黑一片。
南非為咗舉辦世界盃，投放大量資金，本來估計可帶來130億美元經濟效益，但越嚟越多證據顯示，如意算盤唔單止打唔響，甚至有可能係歷來蝕得最入肉嘅一屆。按均富估計，受環球不景氣影響，遊客將較早前預計嘅48.3萬人少23%。
國際足協未開波先大賺
同中國搞奧運相似，興建場館投資同門票收入根本不成正比。94年嗰屆，美國已有好多大型場地，只用3000萬美元就搞掂，今屆南非政府卻花上26億美元。本來投資有助就業，當地的確多咗2.2萬份工，但逾七成係臨時工，有啲建築工人時薪更低至1美元，帶挈當地最大建築公司南非建築賺大錢，09年稅前盈利大升1.42倍。
不過，幕後賺得最多係國際足協（FIFA）。南非政府視世界盃為外交任務，為FIFA提供免稅優惠，單係賽事前盈利已超過32億美元，係歷屆最高，多過南非政府投入嘅資金規模。
國家搞大Project，卻要市民埋單，最終益晒商家同外資，令貧富懸殊問題更嚴重。今時今日全球經濟仍未穩妥，他日國際盛事再舉行，係咪應該鼓勵簡約環保主義，唔使次次放全球最大嘅煙花、建最豪嘅場館，只需用心用誠意將項目搞好？
胡孟青