公投運動投票率唔理想，八方好多朋友都話要移民，咁不如搞多次公投，睇吓邊處最適合港人移民。港大民意網站噚日公佈香港人對各地人民同政府觀感嘅調查結果，顯示港人好仰慕新加坡政府，好感與反感比例係57：8。咁香港政府呢？23：26，五個華人國家或地區中排尾二，衰過澳門同大陸。
曾淵滄選擇住喺香港
八方將結果告知新加坡出世嘅經濟學家曾淵滄，佢話唔出奇，原因係：「所有人對自己唔清楚嘅嘢都會有好感……我選擇住喺香港，你就知邊度好啲。」即係話，香港人最唔清楚新加坡政府嘅惡行。新加坡政府以惡聞名，至今仍未廢除笞刑；三年前有班歐盟議員去參加會議，竟然被新加坡政府禁止發言。
呢個調查喺今個月7至12日進行，訪問咗過千個香港人，了解佢哋對16個國家同地區嘅人民同政府觀感。喺五個華人國家或地區當中，香港政府排尾二，只有23%受訪者對港府有好感。貪腐醜聞頻生嘅澳門政府，反而有34%港人對佢哋有好感。
澳門特首「笨忍」崔世安上場後劣評如潮，居然都獲得部份港人賞識。本身係香港人嘅澳門理工學院社工課程副教授蘇文欣咁樣分析：「咁都係正常嘅，因為澳門政府做咗一樣香港政府唔敢做嘅嘢，就係派錢！」蘇教授話，站在社會福利立場，派錢唔係解決民生問題嘅好方法，但係香港人好現實，好受落呢啲現兜兜派錢措施。
之但係連大陸政府冇派過錢，都跑贏香港政府，點解會咁？曾經被大陸政府趕走、流落日本機場幾個月嘅上海維權人士馮正虎就話：「我沒有太大的意外，大陸政府對香港的管治方法，跟大陸很不同。」調查顯示，香港人對日本政府有好感嘅只有20%，差過大陸政府好多。馮正虎話好難比較，只係知道日本政府將人民放喺第一位，大陸呢？並唔係人人平等。
遠距離將觀感浪漫化
呢個調查由08年開始，睇走勢，香港人對大陸政府同澳門政府嘅觀感其實係越來越差，不過差極都仲好過香港政府。中大政治與行政學系高級導師蔡子強話，調查只係反映咗香港人嘅情緒，對自己政府不滿會比較多，對有距離嘅其他政府，觀感就浪漫化：「試吓真係畀你喺大陸同澳門住一排，睇你係咪真係對個政府咁冇意見！」
mailto:[email protected]
港人對各華人國家或地區政府觀感
國家/地區：新加坡
好感比例：57% 反感比例：8%
國家/地區：澳門
好感比例：34% 反感比例：15%
國家/地區：大陸
好感比例：32% 反感比例：21%
國家/地區：香港
好感比例：23% 反感比例：26%
國家/地區：台灣
好感比例：19% 反感比例：22%
資料來源：港大民意網站