內地打壓樓市無疑係一項針對樓價上升之措施，但中國地方咁大，每個省市經濟實力都唔一樣，自然對私人房屋需求都唔一樣，若然以一套死硬式政策全面封殺房地產市場買賣活動，隨時係政策錯配之餘，亦會有一定盲點。
坦白講，香港人連香港本土樓市都未必睇得清，何況係大陸樓市！好似上海傳緊徵收房產稅，呢個政策其實以後都必未會普及全國，受影響理應只係在上海有項目之相關內房股。由於一線城市受打壓可能性太大，唔少內房股已將發展焦點轉移至二三線城市，目的係要避開打壓風頭。
內房股昨見悉數低位回升，其中遠洋地產（3377）昨低開5.32元後即回勇，以近全日高位5.64元高收，升5.4%。走勢有見底迹象，可入市博反彈，目標6.4元，失守年內低位5.23元止蝕。遠洋地產今年主攻二三線城市，今年首四個月銷售平均每方米逾1萬元人民幣（下同），雖比去年1.1萬元為低，但集團仍維持全年目標銷售額200億元，兼且唔會減價。
方星俠