鄉議局石門新會址大過九龍塘現址好多倍，可以聚埋多啲鄉紳開會增加人氣，主席劉皇發不諱言「間屋咁大，搵多啲人嚟都熱鬧啲。」所以近期招攬唔少人入鄉議局做顧問，包括「玩具大王」蔡志明同自由黨常委田北辰，兩新丁噚日首次踏足鄉議局，親身感受新界人一邊開會，一邊食嘢兼傾電話嘅賓至如歸開會文化。
家住沙田九肚山嘅蔡志明早前捐咗三百萬元畀鄉議局，新大樓為佢預留一席可以理解；田二少下屆立法會出戰新界西，率先同班鄉紳拉關係相當實際。但發叔先旨聲明，叫田二少唔好期望太大，因為鄉議局優先幫自己人拉票，顧問始終隔一重，「冇咁親」。田二少噚日仲透露自由黨考慮派人參選南區區議會補選，挑戰維園阿哥馬草泥。