【英格蘭（C組）】香港啲球隊喺出發比賽前會拜神切燒豬，不過英格蘭喺到奧地利進行世盃集訓前，就選擇咗做善事，佢哋除咗搞咗個叫「團結就是力量」（TogetherWeAreStronger）嘅活動，仲答應捐晒100萬鎊（約1,120萬港元）嘅世盃出場費出嚟。英軍咁好人好事，我求大俠都希望佢哋喺嚟緊嘅世盃決賽周，可以攞到好成績啦。
英格蘭班國腳前排因唔肯捐錢俾護士組織而俾人狂插，加上陣中一對泰利同里奧費迪南有婚外情醜聞，其中前者更因此而冇得做國家隊隊長，所以英軍嘅形象搞到好差。家陣佢哋喺出戰世盃前做番啲嘢參與慈善活動，肯定幫自己攞番唔少分。
出錢出力助弱勢社群
呢個叫「團結就是力量」嘅慈善活動喺上個月23日正式開始，英軍班球員會幫手宣傳，等社會各界可以向WellChild、Children'sHospicesUK、卜比摩亞基金（theBobbyMooreFund）同埋職業球員聯會和英格蘭國家隊慈善外展計劃（thePFAandtheTeamEnglandFootballer'sCharityOutreachProgramme）等慈善組織伸出援手，等有需要人士得到幫助。有興趣嘅人士，不妨到呢個網址www.teamenglandfootballerscharity.com睇睇。
謝拉特咁講：「啲人成日當我哋呢班球員係明星，但我認為WellChild班護士先至係真正嘅明星。世盃臨近，我哋透過幫手宣傳，令有更多人知道佢哋嘅工作係幾咁有意義。」泰利亦話：「我哋唔係住喺象牙塔。我哋應該知道呢個世界係點，幫助社會上嘅弱勢社群。」英軍班球員除咗出力仲出錢，事關佢哋將世盃出場費捐晒出嚟，約莫有100萬鎊，都算唔話得。