iPad連線iPhone　6人體感打烏蠅

iPhoneApps玩得多，簡單到好似本地MiniGame，或複雜到移植街機遊戲等，統統玩過晒，但講到將iPhone變手掣，再連接iPad對住個大芒打機，你又試過未？本地iPhone遊戲開發商MPad，佢唔單止將呢種概念實踐，更追加MultiPlayer，最多可6人同行；講起齊齊玩，佢仲計劃緊推出廣東麻雀同鋤大D！

記者：陳國輝
攝影：林栢鈞

iPhone扮老任手掣

iPhone同iPad可以溝來溝去，睇怕大家都無諗過！簡單講，兩機先以Wi-Fi或藍芽相認，iPhone就立即變身做遊戲手掣，而iPad就變為遊戲顯示屏。負責人Alex話，呢種玩法喺香港尚算首見，雖然唔係全球第一隻，但亦可叫做老二了！MPad–Plane設計好簡單，十足廿幾年前嘅烏蠅機，不過佢隨時玩到你同老友掟掣隻揪！過關、打大佬呢啲傳統菜式，遊戲內統統欠奉，反而置Friend於死地，呢樣先係至勝關鍵。值得一提係，當iPhone變手掣之後，除咗好似Wii咁用體感操作，更可選擇傳統Joystick，直接㩒四方向鍵玩，至於體感嘅靈敏度以及垂直橫向等方式，亦全部有得揀。

■Alex（左）同Andy（右）負責遊戲製作及宣傳，可謂一腳踢！

6人以上立即拖慢

小記試玩咗三款遊戲，其中MPad-Plane由啟動、連接手掣以至遊戲進行期間，基本上都無出現過窒機情況；至於手掣操控方面，我最鍾意用體感嚟控制飛行，動作流暢之餘，感覺又幾真實。但講到最正，必提MultiPlayer六個人一齊玩，MPad方面解釋，查實佢哋亦試過用六部或以上iPhone來進行遊戲，點知就出現拖慢畫面，佢建議玩家人數最好六人以下，並以Wi-Fi連線，效果最理想！
想試玩，記得先單撈MPadController程式，安裝落iPhone，然後先下載遊戲。Alex話，暫時只收取MPadController費用，售價0.99美元，至於需駁iPad玩嘅遊戲，則屬免費，有興趣就快啲拎部iPhone出嚟試喇！