高官口誅筆伐公投後，政府噚日改玩軟銷政改，推出新一輯電視廣告，其中名為「信任讓夢想成真」嘅廣告，搵咗個少女着小背心上鏡，又有校服look，難怪高登網民即時提醒巴打小心，唔好中政府呢條爭取毒男民意嘅奸計。
「信任讓夢想成真」橋段簡單，有個少女睇中一條去graddin着嘅裙，想做裁縫嘅媽媽幫佢做，但媽媽好忙，令佢驚不能如期起貨冇得着，好彩媽媽準時搞掂。廣告內容同通過政改有乜關係，八方冇乜頭緒，網民初步反應好壞參半，壞嘅係鬧廣告內容九唔搭八，好嘅主要係讚個女主角好pure好純。有高登巴打指政府「出小背心攻毒男」。出到呢招，問你社民連驚唔驚！