恬妞客串演出新戲《前度》飾演鍾欣桐阿媽，有一場講兩母女訴心曲嘅戲份，恬妞忽然攞咗一條自己織嘅手繩送畀阿嬌做生日禮物，祝佢工作開心順利，阿嬌感動到失控流淚，結果佢由飲泣變嚎哭，場戲好快拍完。恬妞同阿嬌喺《西遊記》合作時已相當投緣，今次再結片緣，兩人投契到雞啄唔斷，好似兩姊妹咁好感情。