淡友得勢不饒人，港股又再大插超過430點，收報19715點，最恐怖期間，大市曾急瀉超過550點，各類股份全線報跌，而且跌勢全面，大跌市中散戶要搵隻逆市奇葩，可謂認真唔易。
市況波動，形態似「向下炒」，這款形勢之下散戶要入市，策略最好都係採取低撈手法，見愛股受市況拖累跌得太殘，打算趁低買貨，不妨將買盤排低幾格，唔使太急進高追；有人不問價掟貨落來，橫掂你都係想買，咁又畀你接到，無疑正中下懷。當市況回穩，咁隻股票都應該會跟升。
汽車股跟隨大市向下，東風集團（489）昨日除息，亦難抵抗淡風，跌5.7%報9.32元，股價重返去年11月水平。東風去年純利62.5億元人民幣，增長58%；今年首季盈利更達28.5億元人仔，按中國會計準則同比增長2.35倍。集團手頭現金超過200億元。以高位14.36元計，過去個半月至今跌幅累計逾35%，家陣入市博反彈有一定值博率，短炒反彈目標10元，以8.8元止蝕。
方星俠