市場擔心歐元區瓦解，其實長痛不如短痛，瓦解後咪好似啲經常被低估嘅股票，私有化後可釋放價值。與其為咗面子夾硬維持歐元區「河蟹」，搞到大家口和心不和，市場信心盡失，倒不如回復舊制，或逐出本來就冇條件共榮嘅弱國，至係拯救歐元同重建市場信心嘅做法。
歐洲危機加劇，內地炒風卻依然旺盛，中央「新國十條」推出一個月以來，各大城市成交量大減，但樓價仲未有下調迹象。溫州炒樓團有錢，炒樓唔使造按揭，收緊銀根對佢哋影響唔大，一樣可以持貨善價而沽，甚至將額外資金調去炒金炒期指炒蒜頭。本周五滬深300期指首次結算，被指係市況急跌嘅元凶，同期開戶數目又真係由2000幾個急升至2萬個，唔使講都知道熱錢去咗邊。
睇銷售 測後市
既然低息環境繼續有利投機炒作，房地產呢塊肥豬肉，炒家當然唔會輕易放過，加上中央將大力興建保障性住房，日前水泥股已開始報復式反彈，下一梯隊不妨留意吓建築工程機械設備股。早前見過中駿置業（1966）老闆黃朝陽，佢跟日本住友一向有合資產銷建築用掘挖機，順便攞啲料，發現今年首季售出嘅掘挖機，已多過舊年首10個月。
起樓梗要有挖土機，上月內地整體銷售按年倍增至超過1.6萬台，A股上市嘅三一重工銷量增長1.2倍至超過1400台；中國龍工（3339）賣出646台，增長1.86倍。龍工盈利正係樓市寒暑表，從業績睇，公司已度過最壞時刻，回復較佳增長，毛利保持約兩成水平，現市盈率僅約10倍，具一定防守性，股價於5元水平有一定支持。
早前公司贖回大部份07年發行嘅CB，未來公允值虧損對賬目影響減至最低，業績將更能反映業務表現。不過基金股東似乎未沽完貨，繼鄧普頓後，新加坡政府投資基金上月中再減持0.96%。公司去年8月發嘅新一批總值1.35億美元零息CB，行使價7元，且看會否對股價走勢有啲啟示。
胡孟青