五區公投，公民黨同社民連五個候選人以大比數拋離對手係意料中事，所以噚日凌晨好多大嗱嗱用成5萬蚊入場陪跑嘅候選人，都費事夜麻麻走去點票中心戥人高興，結果現場幾乎成為公民黨、社民連同大專2012嘅慶功派對。佢哋嘅助選團情緒不知幾高漲，雖然選舉結束，但社民連中人仍繼續狙擊白姐姐。
社民連助選團噓不停
社民連噚日凌晨以龐大陣容殺入會展傳媒中心，為重返議會嘅三位大佬吶喊助威，更延續助選時嘅「激情」，所以當白姐姐以及佢老公謝偉俊到場，以至白姐姐上台聽點票結果時，社民連中人都洶湧而上，大叫「無恥」同「廢除功能組別」，掀動全場氣氛。
唔止白姐姐同謝偉俊得到如此熱烈嘅對待，選管會主席馮驊發言時，亦被社民連中人大叫「無恥」；身為終極普選聯盟成員嘅學者蔡子強亦被追住大鬧，就連喺度採訪嘅攝影記者，請社民連助選團坐低唔好阻住鏡頭時，也被叫「主流傳媒可恥」。
林依麗埋泛民堆搶鏡
公民黨助選團相對平靜好多，但就好有口福，因為一整日都冇為女友陳淑莊Tanya助選嘅英雄哥，竟然夜麻麻攞住一大袋佢舖頭《仙宮樓》出品嘅菜肉包趕去傳媒中心，慰勞Tanya嘅助選團。呢種愛屋及烏嘅精神唔係人人做到，Tanya個包食落肯定啖啖甜，可惜普選仲未來臨，Tanya嫁期仲未落實。
全場最high嘅仲有九龍西奇女子林依麗，佢明明唔係泛民中人，但因為喺今次補選中以白姐姐為狙擊目標兼成功「胸」襲謝偉俊，就同社民連助選團忽然friend咗。林依麗上台時唔少社民連支持者都報以拍掌歡呼，佢亦好享受呢一刻剎那光輝，舉晒勝利手勢向對方致意。到公、社兩黨候選人同助選團上台大合照時，佢亦唔客氣，走上台攝咗個靚位，成為見證特區公投歷史嘅重要一員。
周澄阿媽低調撐愛女
第一次參選已經喺新界東攞到萬七票，大專2012周澄被喻為少女版民主女神真係當之無愧。雖然周澄媽媽、著名編劇岸西唔干預阿女做乜，但始終年紀輕輕嘅囡囡投入咗場受打壓嘅新民主運動，做阿媽嘅唔多唔少會擔心。
唔會加入政黨
岸西噚日凌晨亦有去點票中心，同大專2012助選團一齊靜候結果。八方現場所見，周澄成場唔係接受傳媒訪問，就係要同戰友傾嘢，兩母女冇乜時間交談，岸西只係默默坐喺一角，睇住囡囡接受訪問。可能唔想搶咗囡囡鏡，岸西一律拒絕傳媒訪問，但周澄就喺選舉結果公佈後話，媽媽都戥佢好開心。
5.16公投唔係民主運動嘅終結，亦唔會叫停周澄嘅民主路，佢話會將唔使被沒收嘅5萬蚊選舉按金改做抗爭基金。但佢話暫時冇諗過從政，亦肯定唔會加入政黨。
mailto:[email protected]