政府早前宣佈落實增加發展商賣樓透明度的9招12式，不少地產商私下抱怨政府「夾硬嚟」，地產建設商會副主席兼新世界執行董事梁志堅更狂呻執行上有困難，但「點唔鍾意都冇辦法」，令人關注地產商會否又像上次賣地般「玩嘢」，向政府還以顏色。有官場中人稱，政府從來不擔心地產商「玩嘢」，更不相信地產商會與荷包鬥氣，為了「啖氣」不投地，變相壓低地價益了其他投地對手。
收回土地「受得起」
一眾地產商上次賣地時有否「玩嘢」向政府示威？官場中人說，政府的研判是「冇證據話有，但又冇證據話冇，但係成個競投氣氛好唔尋常、唔似正常拍賣，就係人都睇到」，或許某些地產商以為，向政府搞搞小動作，會影響政府推行9招12式的態度，但實情是政府內部曾評估，就算去到最差情況，有土地因未到價而收回，政府也「受得起」，其中一個原因是政府的責任是維持足夠土地供應，地產商是否願意競投、價格高低該由市場決定。
再者政府相信，香港地產商多的是，並非外界想像般團結，「某啲大地產商唔投地，個價低咗，咪益咗其他中小型地產商。香港又唔係淨係得嗰幾個地產商，總之有人投到塊地，保持足夠單位供應，令樓市平穩，政府理得塊地賣畀邊個」，所以政府根本不會在9招12式上讓步，就算梁志堅說執行有困難，政府一樣「冇面畀」，「總之地產商一定有辦法做，做唔到咪立法！」
年輕人嚷着要買樓
反而一般市民對樓價的期望及買樓習慣，卻令政府更難搞，正如煲呔昨日在電台說，現時不少香港年輕人習慣一畢業就說要買樓，但年輕人的經濟能力往往未必可以負擔首期，加上港人習慣樓價高時「個個搶住買」，樓價下跌則沒有人肯出手，成交量很低，這種買樓「習慣」，令政府制訂房屋政策倍感困難，就算政府出手壓抑樓價、市民一樣可能不買樓，令政府左右做人難。