好快就到六四21周年，國殤之柱創作人丹麥藝術家高智活有意喺6月1日訪港，修補國殤之柱。不過高智活舊年六四20周年前夕曾經被拒入境，佢擔心今次都有可能入唔到境，唔想嘥咗機票錢同時間，因此特別想問清楚香港政府，究竟今次會唔會放行。
特區政府可能未收到指示，未有答案。八方噚日向入境事務處查詢，對方回應話，入境處會根據香港法例、現行政策同按個別情況，決定係咪批准個別人士嘅入境申請。又話入境處喺審批時，會考慮所有與申請相關嘅因素同情況，但就唔會評論個別個案。呢個答案，入境處用咗肯定超過一千次，但八方報道向來持平，所以照寫出來，浪費紙張都冇辦法。