沈殿霞（肥肥）契爺、曾兩度獲封台灣金馬影帝嘅資深演員葛香亭，近年曾先後患上心臟病同埋中風，早前又因為肺積水入過醫院，前晚佢因為多重器官衰竭喺台北屋企病逝，享年93歲。
葛香亭曾主演電影《養鴨人家》，佢近年因為身體差，已經好少公開露面，最後一次係前年坐輪椅出席「二○○八歲末感恩群星耀紅樓」活動。
家中不適拒入院
葛香亭大前日開始覺得唔舒服，但就唔畀屋企人送佢入醫院，捱到前晚最終都走咗。葛香亭嘅仔葛小寶早年已繼承咗佢嘅衣鉢，投身演藝界，但係好不幸佢喺00年因為膀胱癌病逝，葛香亭要白頭人送黑頭人，前年連契女肥肥都因病先走一步，為咗怕葛香亭受唔住刺激，佢屋企人都唔敢講佢知肥肥死訊。
葛香亭孫女葛淑娟前晚喊唔停咁話：「他一直都有病在身，走的時候很安詳，沒有遺願，家人都陪在身邊。爺爺一路好走，希望爺爺可以在天堂看到爸爸（葛小寶）。」葛家得到台灣新聞局電影處長陳志寬幫手安排葛香亭嘅後事，下周五會喺台北巿第二殯儀館舉行告別儀式，遲啲仲有葛香亭回顧展，到時仲會邀請曾志偉同成龍嚟送佢最後一程，有消息話葛香亭嘅骨灰會安置喺法鼓山。