近期香港不時有精神問題人士，突然失控斬傷甚至斬死人事件，令大家終日提心吊膽。置地早喺06年已經開始主辦嘅慈善活動「鼠戰中環」籌款，就係提供精神健康服務，嚟緊佢哋喺10月24日就會舉行五周年賽事，大家都應該要支持一下。
據香港置地總裁彭耀佳介紹，佢哋會將籌得嘅部份善款，喺新界購置一項物業，為精神康復者出院後，提供一個過度期嘅住宿宿舍，幫佢哋再次融入社會。呢項新服務會喺今年7月投入服務，到時會由精神康復慈善機構負責營運。置地同母公司怡和集團一早已經身體力行，每年仲為精神康復者提供幾十個職位，畀個機會佢哋重新投入工作同社會，呢種做法真係值得一讚，唔知其他大企業有無諗過跟住做呢？
李華華