五區公投投票人數未盡如人意，林公公即時厚顏回應，話政府同時要照顧冇投票嗰280萬選民意見。明明有得投票又唔表態，俾高官強姦民意真係冇嘢好講。不過有網民就喺facebook開群組「516我冇投票或投白票/廢票，但我要雙普選！」，話「同是民主路人，冇投票，係因為理念有落差」。
「有票你投唔去投」
膠group開咗一日，約有56人加入，不過唔少人入組係為咗留言媽叉開group嘅膠人。有網民直接話「有票你投唔去投，你要普選做乜？」有網民話呢個係facebook史上最膠嘅群組，「即係等如冇買六合彩但又想中頭獎」，質問係咪「坐喺梳化食薯片飲汽水就會突然有民主」？
好多網民認為，如果未滿18歲做選民而入呢個group可以理解，否則真係接受唔到囉。膠group嘅討論伸展至高登，有高登友話開group人係孩童之言。有人就打咗個比喻，問呢班人係咪「冇食飯但又要飽」，「覺得佢哋見解好獨到好理性」。