台灣鴻海集團董事長郭台銘，前年迎娶舞蹈老師曾馨瑩（狗狗）後，舊年4月就生咗囡囡郭曉如，近日有傳佢再度有喜懷孕三個月，噚日佢哋帶埋囡囡出外散步，雖然身為大集團揸弗人，不過郭台銘放下身段推住BB車，一副慈父相。
難得家庭日，郭台銘赤腳瞓喺國父紀念館嘅草地上，又將囡囡抱起玩到不知幾開心，傳又懷孕三個月嘅狗狗就坐喺旁邊不時展露幸福笑容，現場見佢雖然個肚仍未隆起，但仍不時輕手摸吓肚皮。
「比較喜歡女孩子」
記者趁機會上前訪問，狗狗一啲都唔抗拒，仲指住囡囡頭上嘅一頭鬈髮笑笑口話：「這是她爸爸的傑作。」郭台銘就一副有女萬事足嘅樣話：「她現在已經會叫爸爸、媽媽。」全家人企定定任影，表現大方。
問到狗狗肚中BB係仔定女？佢露出神秘微笑支吾以對，佢話：「到時候就知道。」郭台銘就好老實咁話：「比較喜歡女孩子。」追問狗狗肚中BB幾大？佢就好怕醜咁匿埋喺老公身後，由老公擋駕。